vnimedia:-
सोमवारी गडचिरोली जिल्ह्यात शालेय लसीकरण दिवस विशेष लसीकरण मोहीम सुरू...
- १५ ते १८ वयोगटासाठी शाळांमधे विशेष मोहिमे अंतर्गत लसीकरणाचे आयोजन...
गडचिरोली जिल्ह्यात विशेष लसीकरण मोहीम सुरू असून यामध्ये १५ ते १८ वयोगटातील विद्यार्थ्यांसाठी शालेय स्तरावरच विशेष मोहीमेचे आयोजन करून सोमवार दिनांक १० जानेवारी रोजी शालेय लसीकरण दिवसाचे आयोजन केले आहे. याबाबत आज जिल्हाधिकारी संजय मीणा, मुख्य कार्यकारी अधिकारी कुमार आशीर्वाद यांच्या उपस्थितीत संबंधित विभाग प्रमुखांची बैठक ऑनलाइन आयोजित करण्यात आली होती. यावेळी बैठकीत शिक्षणाधिकारी, आरोग्य अधिकारी यांना लसीकरणाबाबत विविध सूचना देण्यात आल्या. शाळेतील १५ ते १८ वयोगटातील सर्व ५५१६२ विद्यार्थ्यांचे १००% लसीकरण करणे अवश्यक आहे. .
८ जानेवारीला शाळेतील १५ ते १८ वयोगटातील सर्व विद्यार्थ्यांची यादी तयार करणे व गटशिक्षणाधिकारी/ तालुका वैद्यकीय अधिकारी यांच्याकडे जमा करणे याबाबत सूचना देणेत आल्या आहेत.
सोमवारला वरील गटातील विद्यार्थी लसीकरणासाठी उपस्थित ठेवणे करीता शालेय स्तरावर सूचना दिल्या आहेत. पालकांना लसीकरणाबाबत तालुका स्तरावरून आवाहन करण्याचेही सांगण्यात आले आहे. तसेच जिल्हा प्रशासनाकडून लसीकरण मोहीम यशस्वी करण्यासाठी पालकांनी आपले पाल्य शाळेत पाठवण्यासाठी त्यांना आवाहन केले आहे.
जिल्ह्यात ५५ हजार १६२ विद्यार्थी १५ ते १८ वयोगटातील येत असून या दिवशी जास्तीत जास्त विद्यार्थ्यांचे लसीकरण पूर्ण करण्याचे नियोजन जिल्हा प्रशासनाकडून करण्यात आले आहे. आज झालेल्या बैठकीत जिल्हा आरोग्य अधिकारी डॉ.संजय जठार, डॉ.विनोद म्हशाखेत्री, शिक्षणाधिकारी आर पी निकम, डॉ.पंकज हेमके, डॉ.बनसोडे तसेच तालुकास्तरीय अधिकारी यावेळी ऑनलाइन स्वरूपात उपस्थित होते.
गडचिरोली जिल्ह्यातील लसीकरणास पात्र असलेल्या विद्यार्थ्यांच्या पालकांनी सोमवारी शाळेत पाल्याला पाठवून कोरोनाची लस टोचून घ्यावी. कोरोना संसर्गाची वाढती आकडेवारी पाहून याबाबत संसर्ग आटोक्यात ठेवण्यासाठी व त्यापासून विद्यार्थ्यांना सुरक्षित करण्यासाठी हे लसीकरण महत्त्वाचे आहे - मुख्य कार्यकारी अधिकारी, कुमार आशीर्वाद
