दि.०८.०६.२०२३
ट्रॅक्टर व दुचाकीची जबर धडक, पत्नीच्या डोळ्यादेखत पतीचा मृत्यू!
विदर्भ न्यूज इंडिया
भंडारा : साकोलीपासून चार किलोमीटर अंतरावर असलेल्या कुंभली बस स्थानकाच्या अगदी समोरच ट्रॅक्टर व दुचाकीची धडक झाली.
यात दुचाकीवरून जाणाऱ्या पती-पत्नीपैकी पतीचा घटनास्थळीच मृत्यू झाला. तर, पत्नी गंभीर जखमी झाली. ही घटना गुरुवारी ८ जूनला सकाळी नऊ ते दहाच्या दरम्यान घडली.
ईटखेडा या गावाहून अमोल विश्वनाथ हटवार (२५) व पत्नी निशा अमोल हटवार दे दोघेही पती-पत्नी दुचाकीने (क्रमांक एमएच ३५, एपी ४१२०) साकोलीकडे निघाले होते. दरम्यान, कुंभलीजवळ दुचाकी अनियंत्रित होऊन ट्रॅक्टरच्या ट्रॉलीच्या मागच्या चाकामध्ये आली. यामुळे अमोल हटवार यांचा जागीच मृत्यू झाला तर पत्नी निशा अमोल हटवार गंभीर जखमी झाल्याने उपचारासाठी साकोली उपजिल्हा रुग्णालयात पाठविण्यात आली. तेथे प्राथमिक उपचारानंतर भंडारा येथे पाठवण्यात आले आहे. हा ट्रॅक्टर (क्रमांक एमएच ३६, एल ६८४४) कुंभली येथील नीताराम भेंडारकर यांचा मालकीचा आहे. तो पोलीस स्टेशन मध्ये जमा करण्यात आला आहे.
तीन महिन्यांपूर्वीच झाला होता विवाह
अमोल हटवार याचा रामनवमीच्या दिवशी म्हणजे तीन महिन्यापूर्वीच विवाह झाला होता. त्याच्या अचानक मृत्यूमुळे कुटुंबीयांवर दुःखाचा डोंगर कोसळला आहे अमोल हटवार याच्यावर साकोली उपजिल्हा रुग्णालयात शवविच्छेदन करून मृतदेह नातेवाईकांच्या हवाली करण्यात आला. ट्रॅक्टर चालकाला साकोली पोलिसांनी ताब्यात घेतले आहे. पुढील तपास राजेश थोरात पोलिस निरीक्षक यांच्या मार्गदर्शनात सुरू आहे.
